هاونیشتمانانی خۆشەویست

خەڵکی تێکۆشەری کوردستان

هەر وەک ئاگادارن ناوە بە ناوە و هەر جارە و بە شێوەیەک ڕژیمی ئێران هەوڵی ئاژاوە نانەوە و تێکدانی یەکڕیزیی ناو ماڵی کورد دەدا.

رژیم جارێک لە ژێر ناوی ناوچە و ناوچەگەرایی و جارێک لە ژێر ناوی ئایین و مەزهەب لە ژوورە فکرییەکانی ئیدارەی ئیتلاعات و سپای پاسدارانی ئێرانەوە بە پیلان ، پلان بۆ تێکدانی ئەو یەکڕیزییە دادەڕێژرێ کە گەلی کورد لە هەموو ناوچەکانی کوردستان بە ئایین و ئایینزای جۆراوجۆر و هەمە ڕەنگەوە بە ئاشتیانە و وەک کورد پێکەوە خوشک و برایانە ژیاون.

رژیمی داگیرکەری ئێرانی چاوی بەرایی نادا ئەو یەکێتی و یەکڕێزییەی ناو ماڵی کورد ببینێ و هەر وەک چۆن باوەڕی وایە کە تەفرەقە دروست بکە و حکوومەت بکە بەردەوام لە هەوڵی تەفرەقە و دووبەرەکی نانەوە و ئاژاوە دروستکردنە لە ناو چین و توێژەکانی کۆمەڵگای کوردستان.

شەوی ١٤ی ڕێبەندان چەند کەسێکی پەروەردەکراو و داردەستی ڕژیم بە ماشێنێکی پێژۆ چوونەتە ناو گوندی قەڵاواریی سەر بە شاری سەرپێڵی زەهاو لە ئوستانی کرماشان و تەقەیان لە خەڵکی ئاسایی کردووە و چەند کەسێک بریندار بوون.

ڕژیم لەو ڕێگەیەوە دەیهەوێ  لە ئاوی لێڵ ماسی بگرێ و کێشەکە بکاتە کێشەی نێوان دوو ئایینی سوننی و یارسانی ، ئەوەش لە حاڵێکدایە کە باوەڕدارانی ئەو دوو ئایینە سەدان ساڵە وەک خوشک و برا و پشت و پەنای یەکتر بە بێ کێشە پێکەوە دەژین.

ئێمە وەک هاوپەیمانیی سەربەخۆییخوازانی کوردستان وێڕای بانگهێشت کردنی خەڵک بۆ ئارامی و ئاشتیانە پێکەوە ژیان ، داوا لە خەڵکی قەڵاواڕی و کویک و ناوچەکانی دەورووبەری دەکەین، نەکەونە ناو داوی پیلانەکانی ڕژیمی ئێرانەوە و هەروەها داواکارین لە ڕیش سپی و پیاو ماقووڵانی ناوچەکە بە سونی و یارسانیەوە ئیزن نەدەن دۆخەکە لە بەرژەوەندی و قازانجی پیلانەکانی ڕژیم دا بشکێتەوە و ڕەوشەکە بەرەو ئاقارێکی نەخوازراو دا بڕوات.

ئێمەی کورد سەر بە هەر ئایین و مەزهەب و ئایینزایەک بین بە پلەی یەکەم کوردین و کوردستانین و خاڵی هاوبەش و پێکەوە ژیانمان کورد بوونمانە.

بێشک هەر کەس و لایەنێک لەو ناوچانە هەوڵی دروستکردنی ئاژاوە و دووبەرکی نانەوە بدا، ڕاستەوخۆ جێبەجێکاری سیاسەتەکانی ڕژیمی داگیرکەری ئێرانییە.

هاوپەیمانی سەربەخۆییخوازانی کوردستان

١٥ی ڕێبەندانی ٢٧٢١ی کوردی

٤ی فێوریەی ٢٠٢٢ی زایینی

سه‌رنج و كۆمێنت

كۆمێنت

Leave a Reply