پەیامی هاوپەیمانی سەربەخۆییخوازانی کوردستان لە ساڵڕۆژی ٢٨ی گەلاوێژ: نە فتواکەی ڕەزا خان تاریخ مەسرەفی هەبوو و نە فتواکەی خومەینی کۆتایی پێهاتووە.

ڕۆژی ٢٨ی گەلاوێژی ١٣٥٨ی هەتاوی واتە حەوت مانگ پاش ڕووخانی ڕژیمی پاشایەتی ئێران و بە دەسەڵات گەیشتنی ڕژیمی ئیسلامیی ئێران،خومەینی ڕیبەری ئێرانیەکان بە مەبەستی داگیرکردن و کوشتاری نەتەوەی کورد، فتوایەکی لە ژێر ناوی جیهاد بە دژی کوففار دەرکرد.

بە دوای فتوای خومەینی دا جگە لە بەڕیوەبەرانی ئەم فەرمانە واتە چەمڕان،خەڵخاڵی،حەسەنی و زەهیرنەژاد، خێڵی پاسدار و بەسیجی لە ژێرناوەکانی خوێندكارانی پێڕەوی خەتی ئیمام، موجاهیدینی ئینقلابی ئیسلامی،سپاهیانی ئیسلام ، سیاە جامگان، كفن پۆشان و تەیارکراو بە چەک و چۆڵ، بە تانک و تۆپ و تەیارە هێرشێکی بەربڵاویان بۆ سەر خاک و خەڵکی ڕۆژهەڵاتی کوردستان دەستپێکرد و جگە لە لەسێدارە دانی سەدان کەس ، هەزاران کەسیان لە ژن و پیاو،گەنج و لاو ، منداڵ و مێرمنداڵ قەتڵوعام کرد.

سەرەڕای ئەوەی کە ٤٤ ساڵ بەسەر رووداوی 28 گەلاوێژی ٢٦٧٩ی کوردی ((١٦ی ئاگۆستی ١٩٧٩ی زایینی)) و ساڵرۆژی فەرمانی جیهادی خومەینی بەدژی خەڵكی كوردستان دا تێپەڕ بووە، بەڵام بە داخەوە تا ئێستا دۆسیەی ئەو کوشت و کوشتار و قەتڵ و عام و ژینۆسایدەی گەلی کورد کە لە لایەن ئێرانیەکانەوە ئەنجام درا لەلایەن هیچ ناوەند و دامەزراوەیەكی ڕەسمی و جیهانی و لە دادگایەكی نێونەتەوەییدا نەكەوتۆتە بەرباس و لێكۆڵینەوەیەكی جیددی و یاسایی لەبارەوە نەكراوە.

بەشێک لەو شوێنانەی بە پێی فتواکەی خومەینی زۆرینەی خەڵکەکەیان قەتڵوعام و ئاوارە کران بریتین لە : بەشێک لە ناوچەکانی داڵاهۆ ( دەشتی قووچی باشی، مەلا سەرانە، زەردە ، دەشتی زەهاو و …)) ، ناوچەکانی سەر بە شاری سنە(چەم شار)، پاوە، کرماشان، مەهاباد، نەغەدە، مەریوان و هەروەها گوندەکانی قاڕنێ، قەڵاتان، سەوزی، ئیندرقاش,، دیلان چەرخ، حەلبی، كۆیكان، كەرێزەی شكاكان، چەقەڵ مستەفا، خەلیفەلیان، گۆڕخانە، وسووكەند، قەرەگۆل، سەروكانی، دێمەسوور، جافرئاباد، مەرجان ئاباد، بایزاوێ، جبرەیل‌ئاوێ، گوندەوێڵە، دووئاو، كوورەخانەی سارووقامیش، هەڵەقووش، گێجە ‌و سۆفیان و….

فتواکەی خومەینی بە دژی گەلی کورد درێژەی هەمان سیاسەت بوو کە لە ساڵانی ١٣٠٣ تا ١٣٠٦ بە فتوای ڕەزاخان و بە فەرماندەیی قەسابەکەی لوڕ واتە ئەمیرئەحمەدی بە دژی کوردانی لوڕ بەڕیوە چوو کە تێیدا جگە لەوەی بە فڕۆکە لوڕستان بوردومان کرا، سەدان کەس کوژران و لە سێدارە دران.

لەو جوگرافیا سیاسی و جەعلیەی ناوی ئێرانی لە سەر داندراوە، تاکوو ئێستا چەندین حکوومەت ڕووخاوە و دەسەڵات ئاڵوگۆڕی پێکراوە،بەڵام ئەوەی نەگۆڕاوە بیر و ڕوانینی ئێرانیەکان بە دژی گەلی کورد و هەوڵدان بۆ سڕینەوەی ئەو نەتەوەیە بووە،نە فتواکەی ڕەزا خان تاریخ مەسرەفی هەبوو و نە فتواکەی خومەینی کۆتایی پێهاتووە.

گەلی کورد کە بە دوای ئازادی و دیاریکردنی مافی چارەنووسی خۆیەوە بوو کەوتە بەر هێرشی فتواکەی خومەینی، بۆیە لە ئێستا دا تاکە ڕێگەی ڕزگاری و پێشگرتن بە دووپاتە بوونەوەی قەتلو عام و فتوای ئێرانیەکان، خەبات و هەوڵدان و تێکۆشانە بۆ پێکهێنان و دامەزرانی دەوڵەتی سەربەخۆی کوردستان.

هاوپەیمانی سەربەخۆییخوازانی کوردستان داوا لە هەموو هێز و لایەنە کوردستانیەکان دەکا : ڕۆژی ٢٨ی گەلاوێژ بکەینە ڕۆژی بەرخودانی نەتەوەیی بە دژی داگیرکەرانی کوردستان و ئیزن نەدەین ئەو مێژوویە جارێکی دیکە دووبارە بێتەوە.

هاوپەیمانی سەربەخۆییخوازانی کوردستان
٢٧ی گەلاوێژی ٢٧٢٢ی کوردی
١٨ی ئاگۆستی ٢٠٢٢ی زایینی

 

سه‌رنج و كۆمێنت

كۆمێنت

Leave a Reply