ئاشتیاکۆ پوورکەریم، سەرۆکی بزووتنەوەی سەربەخۆییخوازانی کوردستان لە پێوەندی بە ئەگەرەکانی ڕوودانی شەڕ لە نێوان ئیران و ئیسرائیل لێدوانێکی بۆ کوردناسیۆن داوە کە دەقی لێدوانەکە بەم چەشنەیە:
هاونیشتمانانم ، خەڵکی تێکۆشەری کوردستان
هەر وەک هەموو لایەکتان ئاگادارن، شەڕ لە ڕۆژهەڵاتی ناوەڕاست ڕۆژ بە ڕۆژ لە پەرەسەندن دایە و ئەم ناوچەیە لە ناو ئاگری شەڕ دا دەکوڵێ.
پڕیشکی ئەم ئاگرە داوێنی رژیمە داگیرکەرەکانی کوردستان بە گشتی و بە تایبەتی ئیران دەگرێ.
شەڕ ئەگەرچی بۆ هەندێک نەتەوەی حەساوە، خەسار و کارەستبارە، بەڵام بۆ نەتەوە خاک داگیرکراوەکان ڕەنگە نیعمەت بێ، نیعمەتێک کە خۆی لە ڕزگاری و ئازادی دا دەبینێتەوە.
ڕۆژهەڵاتی ناوەڕاست لە ماوەی سەد ساڵی ڕابردوو دا هیچ کات بێ شەڕ و بێ کێشە نەبووە، پرسی کورد لە گەڵ چوار داگیرکەری ئیران، عێراق، سووریە و تورکیە، هاوکات پرسی فەلەستین و ئیسرائیل لە لایەکی ترەوە و چەندین پرسی تر، ناوچەکە وەک گڕکانێک هەر دەم ئامادەی تەقینەوە بووە.
لە شەڕی کەنداو بەدواوە، واتە لە ١٩٩٠ی زایینی بەم لاوە، کە ئەمریکا و هاوپەیمانەکانی هیرشیان کردە سەر ڕژیمی سەددام، پڕۆژەیەک کە بریتی بوو لە نەخشەیەکی سیاسیی نوێ بۆ ڕۆژهەڵاتی ناڤین لە قازانج و بەرژەوەندیی کورد و ئەمریکا، کورد و ئورووپا ، کورد و وڵاتانی دێموکراتی زلهێزی جیهانی هاتە ئاراوە و زۆربەی گۆڕانکارییەکانی ناوچەکە لە ماوەی ئەم چەندین ساڵە دا لە قازانج و بەرژەوەندیی نەتەوەی کورد دابوون.
ئەنجامی ئەم شەڕە، ڕاپەڕینی ١٩٩١ی باشوور و دامەزرانی هەرێمی کوردستانی لێکەوتەوە، تا دەگاتە بە ناو بەهاری عەڕەبی لە ٢٠١٠ کە ئەویش سەرئەنجامەکەی بووە بەرهەمێک کە بە ئازادیی ڕۆژاوای کوردستان و دامەزرانی حکوومەتێکی خۆسەری بۆ کورد کۆتایی پێهات.
دوو ساڵ لەمەوبەر ڕاپەڕین و شۆڕشی ژینا، جیا لەوەی ڕوخساری رژیمی ئێرانی وەک ڕژیمێکی تیرۆریست و دیکتاتۆر زیاتر و ڕوونتر بۆ جیهان دەرخست ، هاوکات رژیمی ئیرانی هێنایە لێواری ڕووخان و بووە هۆی ئەوەی لە ئێستادا، پرسی کورد و باقی نەتەوە خاک داگیرکراوەکانی تری ناو جوغرافیای دەستکرد ئیران، لە ڕۆژەڤی پڕۆژە و بەرنامەی جیهانیی وڵاتانی زلهێز دابێ.
دنیای دێموکرات و زلهیزانی جیهانی بەرژەوەندیی درێژماوەیان وا دەخوازێ کە وەک هاوپەیمانێکی گرینگ لە گەڵ کورد هەڵسوکەوت بکەن و قەرەبووی بەشێک لەو ناحەقیانەی بەرانبەر بەم نەتەوە کراوە، بکەنەوە.
ئەم شەڕەی ئێستا لە ئارا دایە، شەڕێک نییە بە تەنیا بە دژی حەماس و حیزبوڵڵا و حوسیەکانی یەمەن و بەشار ئەسەد، بەڵکوو لێدانە لە پرۆکسیەکانی ئێران، لێدان لە هەر چی لە ژێر ناو و فەرمانی محیوەر و بەرەی بەناو موقاومەت دایە و بە گشتی قرتاندنی پڕ و پۆی تیرۆریسمی دەوڵەتیی ئێرانە، و کۆتا ئامانجیش لێدانە لە خودی ئێران.
لێرە دا ئەرکێکی نەتەوەیی و نیشتمانی دەکەوێتە سەر شانی تاک بە تاکی ئێمەی کورد ، بە تایبەتی هێز و لایەن و حیزبە سیاسیە کورد و کوردستانیەکان، بۆیە لە پەیامێکی کراوە دا ڕووی قسەم دەکەمە وان:
هەمووتان بڕواتان بەوە هەیە کە هێز لە یەکگرتوویی دایە و هێزە کە دەتوانێ باڵانسی هاوکێشە سیاسیەکان ڕابگرێ و بەم هێزە دەتوانین کەڵک لە دەرفەت و قازانجەکان بۆ بەرژەوەندیی گشتی و نەتەوەیی وەربگرین . هەموومان باس لە پێویستیی یەکڕیزیی ناوماڵی کورد دەکەین و دەزانین کە هێزی هەموومان پێکەوە ، ورە و ئیرادەمان بەرز و پؤلایین دەکا و دوژمن بە چۆک دادێنێ.
هۆکار چییە کە یەکڕیزی و تەبایی و یەکگرتوویی ناکەینە بەرنامە و نایخەینە بواری عەمەلی و پراکتیکیەوە؟
ڕۆژهەڵاتی ناڤین لە ئان و ساتی گۆڕانکاریی بنەڕەتی دایە و ئێمە وەک کورد لە هەلومەرجێکی هەستیار و چارەنووسساز داین، بۆیە داواتان لێدەکەم، با پێکەوە دەست بخەینە ناو دەستی یەک. نسکۆ و هەڕەشە و نەهامەتیەکان خەریکن دەبنە دەرفەت، ڕەنگە بە دەیان ساڵی دیکە دەرفەتی ئاوا گونجاومان بۆ هەڵنەکەوێتەوە. دەرفەت هەمیشە لە دەرکەمان نادا، با دەرفتەکان لە قازانج و بەرژەوەندیی نەتەوەکەمان بقۆزینەوە.
گەلەکەمان لە ڕۆژهەڵاتی کوردستان زۆر یەکدەنگ و یەکگرتوو و هاوهەڵوێستن، با ئێمەش لە گەڵ ئەوان هاوڕاستا بین ، با لەوانەوە ئەم وانە گرینگە فێر بین و سەرمەشقی خەبات و تێکۆشانمان.
هەر ئاوەدان بێ کوردستان و پایەدار بێ نەتەوەی کورد، هەر بژین بە سەرکەوتوویی.
