پاش ئەوەی لە ڕۆژی ٢٧ی نوامبری ٢٠٢٤ی زایینی ڕێکخراوی تیرۆریستیی هەیئەتی تەحریری شام، ئۆپۆزیسیۆنی دژبەری بەشار ئەسەد و بەرەی نوسرە کە لە لایەن ڕژیمی تورکیەوە پاڵپشتی و پشتیوانی دەکرێن، هیرشێکی بەربڵاویان بۆ سەر هەندێک ناوچەی سووریە دەستپێکرد و بەشێکی زۆر لە شارەکانی ئەم وڵاتەیان خستە ژێر کۆنتڕۆڵی خۆیان و هێزەکانی ڕژیمی بەشار ئەسەد بە بێ بەرگریکردن ڕایان کرد و ناوچەکەیان چۆڵ کرد، سەرەنجام پاش چەندین ڕۆژ کۆتایی بە دەسەڵاتی ڕژیمی ئەسەد هات و حکوومەتی داگیرکەری سووریە ڕووخا.
بەم بۆنەوە پیرۆزبایی لە هەموو گەڵانی خاک داگیرکراوی ناوچەکە بە گشتی و بە تایبەتی نەتەوەی کورد دەکەین.
گۆڕانکاری بنەڕەتی لە نەخشەی ڕۆژهەڵاتی ناڤین، لە قازانجی نەتەوە خاک داگیرکراوەکان بە گشتی و کورد بە تایبەتی دا دەبێ و بۆیە پێویستە نەتەوەی کورد خۆی بۆ ئاڵووگۆڕی خێرا و پێشهاتەکان لە ناوچەکەدا ئامادە بکا.
لەو سۆنگەیەوە بزووتنەوەی سەربەخۆییخوازانی کوردستان داوا لە هەموو هێز و لایەنە کورد و کوردستانیەکان دەکا، بە پێکهێنانی بەرە و هاوپەیمانییەکی بە هێز، لە دەوری پلاتفۆرمێکی هاوبەشی نەتەوەیی و نیشتمانی کۆببنەوە.
هاوکات داوا لە هەموو گەلی کورد لە هەر چوارپارچەی نیشتمان و لە دیاسپۆرا دەکەین کە بە هەستێکی نەتەوەییەوە بەرگری لەم دەستکەوتانە بکەن کە لە ڕۆژاوای کوردستان بە خوێن و خەبات و قوربانی وەدەست کەوتوون.
بزووتنەوەی سەربەخۆییخوازانی کوردستان
١٨ی سەرماوەزی ٢٧٢٤ی کوردی
٨ی دێسامبری ٢٠٢٤ی زایینی
