بۆ ڕای گشتی:
بۆ ئەندامان و لایەنگرانی بزووتنەوەی سەربەخۆییخوازانی کوردستان:
هەر وەک لە ڕۆژانی رابردوو دا ئاماژەمان بە گۆڕانکارییە بنەڕەتیەکان لە ڕۆژهەڵاتی ناوەڕاست کردبوو و پێشبینی ئەوەمان کردبوو کە ئیسرائیل هێرشەکانی بۆ سەر ئێران دەستپێدەکا، بەرەبەیانیی ئەمڕۆ هەینی ئیسرائیل هێرشێکی بەرفراوانی بۆ سەر بنکە و ناوەندە ئەمنیەتی و نیزامیەکانی ڕژیمی ئێران دەستپێکرد و کۆمەڵێک بەرچاو لە بەرپرسان و فەرماندە نیزامیەکانی کردە ئامانج و لە ناوی بردن.
بە پێی هەواڵ و زانیارییەکان لە ڕۆژهەڵاتی کوردستانەوە، کۆمەڵێک بنکە و ناوەندی نیزامیی ڕژیمی ئێران هێرشیان کراوەتە سەر .
لە ئیستا دا داوا لە ئەندامان، لایەنگران و هەروەها تەشکیلاتی ناوخۆیی بزووتنەوە دەکەین، لە ئامادە باشی تەواو دابن تاکوو لە لایەن بەشی تەشکیلات و ڕێکخستنەکانی بزووتنەوە لە دەرەوە و ناوەوە، ئەرک و ڕێنوێنی و بەرپرسایەتیەکانتان پێ دەسپیردرێ.
هاوکات لەو هەلومەرجە دا داوا لەم کوردە چەکدارانەی وەک جاش و داردەستی ڕژیم چالاکیان هەبووە، دەکەین: هەر چی زووترە ڕیزی خۆیان لە ڕیزەکانی ڕژیم جیا بکەنەوە و پێوەست بە ڕیزی گەل و نەتەوەکەمان ببنەوە و بۆ ئەوەی خۆیان و بنەماڵەکانیان پارێزراو بن، لە ئێستا دا باوەشی گەلەکەمان واڵایە بۆ وەرگرتنەوەیان.
بەشی تەشکیلات و ئەمنیەتی بزووتنەوەی سەربەخۆییخوازانی کوردستان
٢٣ی جۆزەردانی ٢٧٢٥ی کوردی
١٣ی جوونی ٢٠٢٥ی زایینی
