پرۆفیسۆر دوکتور گوڵمراد مرادی، ڕووناکبیر، نووسەر، وەرگێڕ و لێکۆلەری گەورەی کورد و لە سیما ناسراوەکانی فەرهەنگ و مێژووی کوردستان لە وڵاتی ئاڵمان کۆچی دوایی کرد، بەم بۆنەوە بزووتنەوەی سەربەخۆییخوازانی کوردستان پەیامێکی بڵاو کردەوە کە دەقی پەیامەکە بەم چەشنەیە:
بە داخ و کەسەرەوە، هەواڵی کۆچی دوایی پرۆفیسۆر دوکتور گوڵمراد مرادی، ڕووناکبیر، نووسەر، وەرگێڕ و لێکۆلەری گەورە و لە سیما کاریگەر و ناسراوە فەرهەنگی، سیاسیەکانی ڕۆژهەڵاتی کوردستانمان بیست.
بزووتنەوەی سەربەخۆییخوازانی کوردستان بە هۆی ئەم خەسارە گەورەیە ، سەرەخۆشی لە بنەماڵە و کەس و کاری دوکتور گوڵمراد ، کۆمەڵگای فەرهەنگی و سیاسیی کوردستان، خەڵکی کرماشان و سەرپێڵ و گشت خەڵکی کوردستان دەکا و خۆی لەم خەمە دا بە شەریک و بەشدار دەزانێ.
دوکتور گوڵمراد مورادی لە ٢٠ی خاکەلێوەی ١٣١٩ی هەتاوی لە سەرپێلی سەر بە کرماشانی پایتەختی ڕۆژهەڵاتی کوردستان لە دایکبووە و پاش نزیکەی یەک سەدە خزمەت و تێکۆشانی کوردایەتی لە ڕۆژی شەممە ١٣ی ڕێبەندانی ١٤٠٤ی هەتاوی دڵە گەورەکەی لە لێدان کەوت .
ژیانی دوکتور گوڵمراد نموونەیەکی ڕوونە لە پێوەندیی ئێش و ژان و بەرپرسایەتیی تاکی کورد، مرۆڤێک کە زانستی نە تەنیا بۆ ناو و ناوبانگ بوو بەڵکوو لە پێناوی ڕاستی و دادپەروەری و خزمەت بە کوردایەتی بە کاری دەهێنا.
کارنامەی زانستی و فەرهەنگیی دوکتور گوڵموراد، لە وانە وتنەوە و لێکۆڵینەوە لە زانکۆکانی ئورووپا تا نووسین و وەرگیڕانی بەرهەمە ناوازەکان لە پێوەندی بە مێژوو، کۆمەڵگا، پرسی نەتەوایەتی و میراتی مەعنویی ئایینی کوردیی یارسان، بەڵگەی حاشا هەڵنەگرن بۆ ئەوەی بیسەلمێنن کە ئەو هەمیشە هەوڵی داوە دەنگی کۆمەڵگا و فەرهەنگ و مێژووی نەتەوەی کورد و ئایینی پیرۆزی یارسان بە شێوەیەکی زانستیانە بگێڕێتەوە و پێشکەشی کۆمەڵگای بکا.
ئێمە لەو باوەڕەداین کە ناوگەلیکی وەک دوکتور گوڵموراد، بە کۆچی دوایی و مەرگیان خامۆش نابێ، بەڵکوو ڕێگە و ڕێبازەکەیان بەردەوام دەبێ، چونکە ڕێگەیەکیان کردۆتەوە کە ڕێگەی ڕۆشنگەری، زانست، داکۆکی لە کەرامەتی مرۆڤ و فرە چەشنیی فەرهەنگی و ئایینیە لە کوردستان.
سڵاو دەنێرین بۆ گیانی پاکی و ئارامی و سەبووری بۆ بنەماڵە و ئازیزانی بە ئاوات دەخوازین
یاد و ناوی بەرز و بەڕێز و ڕێگە و ڕێبازی رووناک و بەردەوام بێ.
بزووتنەوەی سەربەخۆییخوازانی کوردستان
