ڕژیمی داگیرکەری ئێرانی پاش ئەوەی سەرۆک کۆماری پێشووی واتە ئیبراهیم ڕەئیسی کە لە ئەنجامی تەسویە حیسابات و ناکۆکی و شەڕی ناوخۆیی خۆیان دا کوژرا، بڕیارە لە ڕۆژی هەینی ٨ی پووشپەڕی ٢٧٢٤ لە ئێران و سەرجەم ئەو وڵاتانەی داگیری کردوون، شانۆیەک لە ژێر ناوی هەڵبژاردن بۆ سەرۆک کۆماری و جێگرەوەی ڕەئیسی بەڕێوە ببا.
راستیەکی حاشا هەڵنەگرە کە گۆڕانکاری لە مۆرە ناوخۆییەکانی ڕژیمی ئێران هیچ کاریگەریەکی لە سەر ژیانی نەتەوە خاک داگیرکراوەکان و یەک لەوان نەتەوەی کورد نییە و هەموویان لە پێوەندی بە سەرکوت و کوشت و کوشتار و بەتاڵانبردنی خوێن و خاکی کوردستان خاوەنی یەک بیر و باوەڕن و جیاوازییەکیان نییە و سەرجەمیان لە پێناو مانەوەی دەسەڵاتی ئێرانی داگیرکەر دا کار دەکەن.
بەشداری کردن لە پرۆسەی هەڵبژاردنێک کە لە سیستەمێکی سیاسیی داگیرکەر دا بەڕێوە دەچێ، بە مانای ڕەوایی دان و مەشڕووعیەت بەخشینە بە داگیرکاری و هەموو جینایەتەکانی داگیرکەر.
بزووتنەوەی سەربەخۆییخوازانی کوردستان داوا لە سەرجەم ڕۆڵەکانی نەتەوەی کورد لە ڕۆژهەڵاتی کوردستان ، هێز و لایەنە سیاسییە کورد و کوردستانیەکان دەکا کە بە شێوەیەکی چالاک هەڵبژاردنەکانی داگیرکەری ئێرانی بایکۆت بکەن .
هەموو ئەوانەی لە کوردستاندا دەبنە داردەست و وەپێش لەشکری داگیرکەر دەکەون و هەوڵ بۆ کۆکردنەوەی دەنگ و ڕاکێشانی خەڵک بۆ سەر سندووقەکانی دەنگدان دەدەن، دەچنە خانەی خیانەت بە نەتەوە و نیشتمانەوە و لێخۆش بوون و لێبوردنیان پرسێکی سادە و ساکار نییە و نەتەوەی کورد لە بیری ناکا.
شەکاوە بێ ئاڵای سەربەخۆیی کوردستان
سەردەکەوێ خەباتی سەربەخۆییخوازیی نەتەوەی کورد
بزووتنەوەی سەربەخۆییخوازانی کوردستان
٦ی پووشپەڕی ٢٧٢٤ی کوردی
٢٦ی ژووئەنی ٢٠٢٤ی زایینی
